Ls outores deste blogue son Amadeu Ferreira i Carlos Ferreira.
Zde hai uns anhos para acá que ténen benido a fazer ambestigaçon alredror de ls chamadeiros i a publicar bários artigos subre esse assunto an bários jornales i rebistas. Esse fui tamien l tema de la tese de mestrado de Carlos Ferreira [Toponímia, Paisagem e ambiente. Uma abordagem geotoponímica de Sendin em Terra de Miranda. Um estudo de geografia rural e regional. Universidade de Salamanca, 2003. ], screbida an pertués i mirandés.
La muita ambestigaçon que ten sido feito cumben que baia salindo a público al modo que bai sendo feita pus esse ye un modo de fazer camino na recuolha de nuobos materiales i de ls ir ourganizando. Assi, cada un de ls artigos deste blogue staran siempre an abierto i poderan ser altaradas al lhargo de tiempo, habendo l cuidado de assinalar que houbo essas altaraçones.
Ls artigos a publicar neste blogue seran de trés culidades:
- listas de chamadeiros / topónimos, andicando-se la sue fuonte, séian pessonas, séian las matrizes, séian decumientos, podendo nestes redadeiros causos publicar-se l decumiento;
- studos subre chamadeiros an particular, subretodo de natureza lhenguística i de natureza giográfica, mas nun deixando de ls mirar por outros lhados se fur l causo, yá que la toponímia se acerca a muitas ciéncias que ténen de ser tenidas an cuonta;
- studos doutrinários, de bárias culidades subre chamadeiros.
Las lhénguas a ousar neste blogue son dues: mirandés i pertués, cunsante l region adonde stá situado l chamadeiro ou cunsante ls studos yá publicados háian sido nua lhéngua ou noutra ou la scuolha de ls outores.
La region a agarrar nestes chamadeiros será l çtrito de Bergáncia, anque se puoda ir a outros sítios i países para fazer trabalho de acumparaçon.
Stamos cumbencidos de que ls chamadeiros / topónimos son ua de las percipales riquezas eimateriales de ls pobos i que eilhes tamien fázen parte de l património eimaterial desses pobos que mos ls traírun zde hai muito tiempo, anque todos eilhes séian ua custante custrucion que las pessonas ban fazendo de ls sou spácio bital. Stamos a bibir un tiempo an que l abandono de l trabalho ne ls campos stá a deixar ne ls squecimiento miles de chamadeiros. Eiqui queremos dar nota deilhes, anterpretá-los i, se possible, amostrar cumo se sitúan ne l mapa de ls sítios. Cun este blogue queremos dar un pequeinho cuntributo pa l ambentariar i nun deixar perder este património eimaterial, dun balor cultural ancalculable.
Amadeu Ferreira
Carlos Ferreira
